老人癡呆症

媽媽去年年初照過腦素描, 腦部有輕微萎縮, 醫生說以82歲高齡, 出現記憶力衰退屬於正常現象的.

日子一天一天地過去, 今年記憶力衰退嚴重咗, 唔認得我老公和囡囡, 同時亦認唔到路回家. 數月來記憶時光倒流數十年前, 講一些我唔知道的事與物, 精神好緊張, 常失眠. 上月將家中 $500 及 $1000 紙幣全部掉棄, 近兩個星期晚上出現嚴重幻聽和幻覺, 語無倫次, 上星期日還偷偷溜出街迷路(幸好只在樓下).

前日星期一晚二哥去探媽媽, 替她按摩腳底個多小時, 媽媽好享受, 當晚九點多便睡覺至翌日, 除了食午飯和上廁所, 均處於熟睡中. 昨晚我差不多六點上到媽媽家中拍醒她, 幫她浸腳 (茶籽粉, 香港腳幾乎好番哂, 神奇). 等她飯後休息一陣替她按摩雙脚半小時, 她又好享受地在梳化入睡了, 昨晚同樣地九點幾入睡至今早去叫她起床看醫生.

上星期曾與堂姊商討媽媽情況, 她建議入急症室, 本來打算昨天安排入院, 但她睡了十多小時後精神回復正常, 所以不能入急症室, 改為搵精神科私家醫生, 經 弟兄介紹了曾醫生, 今早去應診, 醫生話不是思覺失調, 係老退化=老人癡呆必定隨之而來的疾病, 必須要透過食藥減慢病情.

今日才知道媽媽20年來有2粒藥是屬於抗抑鬱藥, 因為以前醫生只簡單描述是開心藥, 令我一直不以為然. 我問醫生應否繼續幫媽媽腳部按摩, 他說如果媽媽好享受當然好, 不過我地會辛苦D. 他建議:

~ 每日必須要有20分鐘運動, 行路亦可以, 讓腦部血液運行好D, 以減慢病情惡化;

~ Keep 住有人氣, 多D同佢傾偈 (同住二個哥哥都是沉默寡言 =.=’);

~ 日頭唔好瞓咁多

今日媽媽精神是近月中最好的一天, 同醫生溝通到7成 (她有撞聾, 唔肯帶耳聾機), 對答反應不錯, 醫生先問現在年月日, 全部答唔出, 只答到今日是星期三; 測試記憶能力理想 ( 先比電筒, 間尺, 原子筆, 過數分鐘再問都能一一記得); 要她提供5種水果 (只答到4種: 蘋果, 雪梨, 西瓜, 香蕉) ; 要她提供5種動物 (答到5種: 獅子, 老虎, 豹, 狼, 狐狸), 我同醫生都勁讚媽媽叻; 計數: 100-7=答93; 93-7=答好難, 唔識計, 最後撞6; 自創 98-7=91.

醫生開了一個星期藥, 要試藥, 給了2 種藥, 因為媽媽每天都要服食多種, 此藥能減慢病情惡化和好瞓D, 情緒高漲D, 開胃D.

下星期三覆診, 私家醫生診金高昂, 我同曾醫生講媽媽家境唔好, 結果診金減半, 還寫了轉介信前往東九龍精神科排期.

Suki 打電話查問東九龍, 最快排到明年一月份…好耐啊! 馬上將需要同弟兄姊妹講, 請各人代禱. 神蹟出現, 14:10 去到; 14:18 男護士約見, 我請求他排期能否提早一點, 他看完電腦回覆最快都要11-12 月期間; 14:30 到外面等候排期, 我不斷地祈禱, 男護士帶來好消息, 10月底下午有位…感謝神!! 他還給了一張其他家庭醫生資料給我, 他們都可以開精神科藥物, 但唔肯定有無曾醫生所開的藥物, 診金由 $350 - $500 不等, 藥物另計.