壞電腦入正軌

囡囡自從第一學段考完試後, 便再次沉迷玩電腦, 足有個半月之久, 直到上月底死機後…… @@

早於十二月中, 她常投訴電腦開機出現緩慢, 每次我和老公總會說, 日打夜打, 機唔壞人都會死啦, 又話佢部機九成九中毒. 聖誕節假期還打機過凌晨, 話唔聽, 於是我下了命令, 放完假後要收機, 因為今年的第二學段考試在 2月 16號起, 亦是第三次呈分試, 必須全力以赴.

12月30號出現開唔到機, 找了 Peter 幫手睇機, 他說中毒機會好大, 研究完後發現Hard disk 有部份壞死, 亦無法做Back up. 無機玩但又未放完假, 囡囡搵Net Book 頂癮, 1 月 2 號最後一日假期都唔放過, 第一次連早午餐都唔去食, 話唔肚餓, 從她出生以來, 出現了第一次兩公婆去食飯, 阿囡已步入青春期, 我們要學習適應. 當日晚飯後又入房作最後衝刺, 十點半聽到她將 Net Book 放回入盒內的聲音, 總算是個遵守諾言的人.

因為電腦仍然在保養期內, 昨天老公便送去原廠維修部, 職員第一句便問他, 有無做Back up ? (遺憾是沒有) 繼而叫老公親手按機內的 “復原” 制, 因為無法修復! 職員示意留下電腦, 還說好大機會需要更換新Hard disk, 傍晚便收到手機短訊, 可隨時回去取機. 囡囡對電腦內的圖片及資料無哂, 心中感到很可惜, 但不敢表露, 還對我們說 Sorry, 可能她覺得好大事件, 加上又要爸爸為此事奔波.

我小時候亦沉迷打機, 從打數字怪獸機年代開始 ( 此機可以當計算機用 ), 曾經連續打上七小時, 晚飯都唔食, 直到打爆機才心息. 所以對於囡囡的沉迷我完全明白和理解, 人總有為某事/某人/某物著迷, 但要學識隨時抽身/抽離, 希望阿囡能盡早學會.

假期後返學已第三日, 看見她已投入學校生活, 適應能力算強, 安心 !