懲罰

囡囡每天都會在學校將功課完成，除非唔識做，每個星期六，由上午九時至下午四點半都是外出參加課外活動，晚上便會去公公婆婆家食晚飯，星期日早上返教會，下午會去下街，晚上又會約爺爺食晚飯，所以星期五的功課盡量要於當晚完成，否則星期日數小時便要用來做功課。

昨晚，放學回家後同我講餘下一樣 Comprehension 未做，問可唔可以睇半小時電視後才做，我答應她，但要當晚完成，不要留待今天做，因為今天課外活動後 5：00~7：00與爸爸一起去參加香港大球場的佈道會，難得的是爸爸願意參與基督教活動。誰不知她睇完電視，去了上網做練習，然後玩摺紙，我問點解唔做功課？佢話因為唔識做，我話先收拾書包，食完晚飯後便要做，結果她發現原來總數是有 3 樣功課，結果。。。

飯後，拿著張 Comprehension 問我應該點做？我問明白內文嗎？唔明點解唔查字典？佢話老師講過要經自己思考才可以回答，內文是沒有答案的！我話未聽過不用看內文而懂得做的 Comprehension， 我細看下，內文是講述神創造了很多種類的動物，每種動物有不同的特徵和技能，而問題是要回答每種動物的 Special features/abilities 和 think of a reason why God has made them like this way。我話關於動物的 features/abilities內文不是已清楚提及嗎？原來她不明白features/abilities 點解，於是罵戰由始而開始：

我：點解到四年級，仍未學會查字典？

囡：我叫妳教我，點解次次妳都唔教，妳解比我知 features/abilities是什麼咪得囉？

我：就係妳連 features/abilities 唔明都唔去查字典，如果妳一早去查，就唔會問咁愚蠢既問題，而家仲要比我鬧。

囡：妳快 D 講啦，妳好煩呀。

我：於是我解釋了features/abilities 意思，她終於發現要明白內文才會識答。但她依然固我，唔去查字典。我發出警告，一定要將唔明白的生字查字典及寫上解釋，而此功課一定要在今晚內完成，否則明天早上先取消第一樣畫畫課外活動，之後是游水和打羽毛球。

晚上十點，爸爸回家食完晚飯，她請教爸爸點做，但爸爸同樣看見沒有寫上任何解釋，又向她訓話，她很不滿地上床睡覺，覺得我地點解咁煩。

她今早十點半才起床，已錯過了九點半畫畫班時間，她同我講想上游水堂，我話做完 Comprehension 咪可以去囉。結果拖到十二點半才開始做，但仍未有意識自己先查字典，我於是苦口婆心同佢講：學英文同中文一樣，係要不斷收集生字，詞彙，唔明白的生字，係要靠自己去查字典，然後儲在腦內，平時多看英文課外書的作用便是如此，但妳卻沒有看英文課外書，連學校Comprehension 的生字都唔用心去學、去記，將來驚覺便會太遲喇。妳中文成績咁好，點解唔將呢個技巧運用在英文上呢？最後我陪她一起去查字典，但今天所有活動便需要取消作為懲罰（過去我會因為浪費一堂學費而放她一馬，但從今以後我會堅持到底），她懷著滿腔眼淚地。。。

結果，理解完內文後，咪又識回答所有問題。唉！已經將成本牛津字典裝入電腦內，都仲要咁鬼懶，激死！

** 食午飯時，她同我講：Ms Wong 話上帝創造我們，有 D 人係中文叻 D， 有 D 人係英文叻 D，而佢係屬前者，我話咁係咪要轉一間沒有英文科的學校？而家連中國的學生，英文程度都已超越香港，點解做人唔係要衝破障礙，而係要選擇逃避？

她的笑容在傍晚看見了，因為去找 ChiChiPaPa 借書睇，她說就快考試，稍後才看，但話口未完，手持數本書入房睇。。。