昨天是學校假期，一早帶囡囡去九龍城進行一年一度的兒童健康檢查，囡囡需要填一份 80 題的問卷，她不給我看內容，然後一齊去見姑娘，問卷其中一部份是與父母的關係，姑娘話囡囡填上與父母關係良好，時常溝通，相處和諧，然後我又代囡囡問了一些關於她發育上的疑問，姑娘讚揚囡囡會與媽媽商量，檢查完畢後，在九龍城精品店尋寶，預備小朋友的聖誕禮物。
今天中午食飯時，又勉勵囡囡要勤力讀書，她竟然講 Ms. Wong 真係一位好好的英文老師，對話便由此而起：
我：嗯！同學仔好似唔鍾意佢喎！
囡：係呀，佢地到而家都唔鍾意架，但係我發覺佢真係好好，同以前 D 英文老師唔同！Ms. Wong 會將重點重複又重複地教，直到各人明白哂才教新野。聽講新來既阿 Sir 就唔係咁教。。。
我：咁咪幾好，比妳去選擇，四年裡面邊個英文老師最好？
囡：係Ms. Wong 呀，課堂鐘聲一嚮便會出現，從不遲到，還用埋小息來講書，有 D 老師就唔係，個鐘嚮了好耐才入課室，好似xx科老師。。。
我：咁大家咪無左小息時間？
囡：所以有部份同學唔鍾意佢，但我就覺得好好，賺左好多！（耳濡目染，連『賺左好多』都明點用。）
我：妳而家上堂係咪聽得明白多左？
囡：係呀，有 D 好深而又難明的，她會先用中文講一次，大家明哂後才用番英文，佢好長氣架，我都知佢係想大家完全明白，不過英文故事書就會教得好快，測驗/考試前又會幫我地溫書，串生字，。。。媽媽，Ms. Wong和李 Sir經常都叫我地在家中先備課，究竟是什麼意思？
我：備課是預先將下一堂要教的課題預先睇下，當老師教大家時便會容易明白，因為每堂時間好短，如果各人都預先備課，就不會浪費時間。例如英文故事書，預先將唔識既生字查定中文解釋，就算老師教得快，都唔會全堂都唔明白，通常做完功課，先溫習，後備課。
囡：然後仲要睇多 D 課外書。
我：係呀！D 名校學生上堂係瞓覺，每日除了溫習外，就係睇好多課外書。
囡：我都有聽表姐講過，媽媽，唔怪得知 Ms. Wong上次讚我，佢睇到我本 blue book上寫了很多中文解釋，話全班只有我查字典最多個位。
我：嘻嘻！本書好似係xxx既二手書，係佢查個喎！
囡：我都有查好多架！Ms. Wong和李 Sir 叫我地唔好出外找補習老師，佢地話，校長請了佢地一班咁專業既老師來教我地，只要我地跟隨他們的方法就得喇，而家出面個個都話識同學生補習，如果真係識，校長就唔使請佢地啦。
我：係呢！睇嚟我同 Ms Wong 都幾似，又係好長氣，又係成日重複又重複。。。，但係又唔見妳讚我，仲經常駁我咀。。。
囡：嘻嘻。。。
ps：的確，每天都為著囡囡的英文成績而傷神，到目前仍然只是愛莫能助，我什麼都幫不上忙 。。。不過經過以上對話，看來囡囡真係對老師的說話好重視，亦知道妳由抗拒英文變為接受，我真的很開心，希望妳能珍惜餘下半年時間，在各老師身上吸收讀書技巧，配合妳擁有既聰明，再加多多勤力，相信妳一定會成功。
沒有留言:
張貼留言